القمر الساهر
عايزين نعمل حملة قوية جداا ضد الجمهور البشع بتاع شيرين عبد الوهاب اللي بيتأمر مع الجمهور الأبشع بتاع عمرو دياب ضد جمهور التيمورية تامر حسني


لامتى هانفضل ساكتين ..لحد كدا وكفايا


ناس ما بتصنش العيش والملح غيرانين من نجاحه هي شيرين نسيت تامر وقف جمبها قد ايه


تامر مش بنى أدم ( حقى أقول كده )تامر مستحيل يكون أنسان عادى ( حقى أقول كده )تامر أذكى مطرب فى العالم ( حقى أقول كده )تامر أسطورة لم تتكرر ( حقى أقول كده )



♥.•*´¨`*•(`'·.¸*¤*¸.·'´)•*´¨`*•.♥





مين معايا ..مين هياخد حق تامر من شيرين

احنا التيمورية هناخد حقه من جمهور شيرين شر شر

هناقطع كل ألبومات شيرين ..علشان نعرفها ان التيمورية مش سهلين

♥.•*´¨`*•(`'·.¸*¤*¸.·'´)•*´¨`*•.♥

لحظي السيئ من كام يوم دخلت جروب التيمورية على الفيس بوك وشوفت الحرب المعلنه ..فضلت اكتر من ساعة مش مستوعبة ولا مصدقة الكلام اللي بشوفه



اوعى يكون حد فيكم صدق ان الكلام اللي فوق دة وجه نظري ..


وجهة نظر ايه .؟؟ دي مستحيل تكون وجهة نظر دي مهزلة


دي وصلت ان تلاقي اتنين اصحاب خسروا بعض ووقفوا في صفوف الاعداء
والحرب ضد بعض لمجرد ان دة بيحب تامر ودة بيحب شيرين

وحرب بكل الاشكال لدرجة انها دخلت حرب في الأعراض وختش الحياء كل دة ليه


انا نفسي حد يقولي الشباب دي بتفكر ازاي ؟؟



هايكسبوا ايه من دة ؟



شايفين مستقبلهم فين ؟



فين هموم الفقراء واليتامى والغلابة والمطحونين فين هموم المظلومين المقهورين



فين هموم المسلمين ..فين هموم عراق وفلسطين



فين هموم العربين كل القضايا دي وهمومنا شايلنها وساكتين !!



..علشان نسيب كل دة ونروح نشيل قضية التيمورين



انا كل اللى اقدر اقوله انهم شباب مش وراهم قضية ولا عندهم هدف في الدنيا


ضايعين تايهين جواهم فراغ كبير مش لاقيين نفسهم ..
تفتكروا لو وجهنا للشباب دي رساله هايفهمومها ولا هايعلنوا علينا الحرب وان احنا جواسيس اعداء لمحريرين مصر شيرين وتامر وعمرو دياب
مين اصلا تامر وشيرين علشان نتحد ضدهم ونسينا نتحد ونحد ايدنا في ايد بعض علشان نرفع راس المسلمين
وندافع عن اسلامنا ,,وعن بلادنا
مين تامر وشيرين علشان يبقوا قضيتنا ,, ونسينا قضايانا الحقيقية
على راي محمد صبحي
((صفيحة زبالة قرفانة ن الدبان))
حسبي الله ونعم الوكيل

التسميات: 14 تعليقات | edit post
القمر الساهر



بسم الله الرحمن الرحيم






السلام عليكم ورحمة الله وبركاته




جلست وحدي ..ودفنت وجهي في وسادتي ..وتلاطمت الأحزان داخلي .. وتزاحمت






الدموع في عيني ..وأجد صرختى تبحث عن مخرج لها .. شعرت بكل ذرة في كياني تهتز ألما




تتصارع أحزاني داخلي .. لماذا أنا .. لماذا كل هذا ....لماذا لست كباقي البشر ..لماذا






أجد كل الأبواب بوجهي مغلقة .. ما هو ذنبي الفظيع في هذه الحياة الذي اجترفته






لاستحق كل هذا الألم ..متى ستنتهي معاناتي.. متى الفرج ...هل سأموت هما

نعم أعلم أن الكل مهموم .. والكل لديه مصابه ومشكلته .. لكن لكل انسان طاقة .. وهذه طاقتي ..

مهلا..مهلا..

الى هذه الدرجة أنا ضعيفة




الى هذه الدرجة لا اؤمن بقضاء الله واختياره




الى هذه الدرجة فقدت الرضا




الى هذه الدرجة انا أنانية




الى هذه الدرجة نسيت نعم الله ونسيت معنى الحمد الله

استغفر الله العظيم وأتوب اليه

تذكرت مقولة قديمة تقول ..



إن أشد لحظات الليل سوادا .. هي تلك التي يليها بياض الفجر

و كلما ضاق عنق الزجاجة اقتربت من الخروج

وفوق كل هذا وذاك قول الله العلي العظيم " ان مع العسر يسرا" فمن اصدق منك ياربي






فقد علمتنا ان مع العسر يسر حتى انك لم تقل ان بعد العسر يسرا






فما أرحمك يا رحمن وما اجحدنا نحن الانسان

استغفرك ربي وأتوب اليك ..اللهم لا تؤاخذني بذنبي انا الانسان الضعيف وانت الله الرحيم






والامر لك يارب من قبل او من بعد

هكذا يجب أن نذكر أنفسنا في كل ضيق وفي كل هم وفي كل تيار نواجهه


وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ




وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْرًا




وَمَنْ يَتَّقِ اللَّهَ يُكَفِّرْ عَنْهُ سَيِّئَاتِهِ وَيُعْظِمْ لَهُ أَجْرًا




وهذه قاعدة مضطردة (أي مستمرة)




ضاقت .. فلما استحكمت حلقاتها .. فرجت .. وكنت احسبها لا تفرج




اللهم إني أسألك في صلاتي ودعائي ، بركة تطهر بها قلبي ، وتكشف بها كربي ، وتغفر






بها ذنبي ، وتصلح بها أمري ، وتغني بها فقري وتذهب بها شري ، وتكشف بها همي






وغمي ، وتشفي بها سقمي ، وتجلو بها حزني ، وتجمع بها شملي ، وتبيض بها وجهي
التسميات: 19 تعليقات | edit post
القمر الساهر

بسم الله الرحمن الرحيم
السلام عليكم ورحمة الله
اخباركم ايه يا احلى ناس في الدنيا يارب تكونوا بخييير
انا عرفت الفوت ازاي واللي مش عارف القصة يشوف
التوبيك اللى فات
طريقة التصويت

ودي اهم طرييقة
1- الدخول على السايت
في صندوق شارك معانا (بدون تسجيل) ومجانا
في اول خانة بتكتبوا اي اسم الخانة التانية البلد
وداخل الصندوق هاتكتبوا
لميس محمود متسابقة رقم 8
وارسال وبسسسسسسسسسسسسسس
(ملاحظة مهممممممممة) :: التصويت بيكون على مداااااااااااااار اليووووووووم بس على فترات من اليوم لحد يوم الاحد ان شاء الله .. يعني مش مرة واحدة وتسيبوني :(..واللي عنده
اكتر من كمبيوتر يبقى تمام :))
طريقة تانية
2- عن طريق الخط الارضي 0238376724
----------------------------------
محتاجة تقفوا معايا للاخر لان المنافسة قوية جداااا لحد يوم الاحد مش عارفة لسه هايقرروا ايه ربنا ييسرها
وما توفيقي الا بالله سبحانه وتعالى .. ثم انتم
القمر الساهر

السلام عليكم ورحمة الله وبركاته
النهاردة صراحة لتوبيك يخصني انا ..
محتاجة كل اصحابي وزمايلي المدونين يقفوا معايا..
ايه بقى الحكاية ..
الحكاية ان في اذاعة على الانترنت اسمها راديو صوتكم ,, عملوا مسابقة اسمها "خاليك قدها" كانوا طالبين فيها مذيعين ومعدين واخراج ...
وانا قدمت فيها اعداد واذاعة ,, ان شاء الله ,, وفزت في المرحلة الاولى واتاهلت انا و20 متسابق معايا للمرحلة التانية
المرحلة التانية هايكون اختيار المذيعين عن طريق الفوت "التصويت" بس الطريقة ازاى لسه مش عارفة هايعلنوا عنها بكرة الاحد ان شاء الله ..
فانا محتاجة انكم تدعموني بأصواتكم,, وتبلغوا اصحابكم كمان ..علشان اقدر اجمع أصوات ,,لان المنافسة قوية جداااا ..
قدمت أفكار برامج كتير ,, بس الفكرة اللى انا سجلتها وهتتذاع بكرة ان شاء الله الساعة 10 على www.radiosotcom.com
اسم البرنامج : يلا وورك
الفكرة فكرت فيها لاني شايفة كتير من الشباب تايهين.. متوقعين ان البكالريوس والليسانس كفايا قوي انهم يفتحوا ليهم ابواب الشغل مع ان دة مش كفايا ابدا في 2009
زيبدؤا يشتكوا ان العيب في البلد وانهم يتغربوا أحسن ,, مع ان رايي ان دة مفهوم غلط السوق محتاج ناس كل يوم بس فين الناس اللي عندها الكفاءة؟؟
الهدف من البرنامج
1- تغيير الفكرة السائدة في بلادنا ان ما فيش شغل
2- كل الشباب والبنات اللي مش لاقي شغل يشتغل
3- تاهيل الشباب والبنات بثقافة سوق العمل زى ازاى نجتاز انترفقيو بشكل ممتاز ازاى ندور على شغل بطرق جديدة ازاى نكتب cv متميزة .. الخ من ثقافات سوق العمل
تصوري لبرنامج "يلا وورك"
هايكون 3 فقرات ان شاء الله
1- فقرة "يلا نعرف" .... هايكون معانا خبراء من سوق العمل يعرفونا على المجالات اللى محتاجها السوق وايه المهارات المطلوبة للمجالات دي
2- فقرة "يلا نتعلم" .... هايكون معانا مدربين تنمية بشرية يعلمونا ازاى نطو مهاراتنا ..وازاى نتخذ القرارات الصحيحة والتفكير ونخطط لمستقبلنا ازاي
3- فقرة "يلا نشتغل" .... هاتكون فيها اعلانات لاهم المنح والوظائف في السوق وخاصة المجالات اللى هانتكلم عنها في البرنامج ونبذة عن الشهادات العالمية اللي بيجهل طريقها الكثيرين او عندهم معلومات ضعيفة بتعرضهم لعمليات نصب
وشعار البرنامج .. يلا شباب نشتغل ونحقق ذاتنا
ودة الجروب بتاع البرنامج على الفيس بوك
ياريت تنضمواليه وتبلغوا اصحابكم كمان ..
وتسمعوني بكرة ان شاء الله الساعة 10 على راديو صوتكم
علشان نعرف طريقة الفوت ازاي .. وتدعموني بأصواتكم ..
ملحوظة ... انا حضرت كويس قوي لتيست الصوت ..بس لاني اول مرة اقف قدام مايك فعلا توترت .. بس عملت اللي عليا والتوفيق من ربنا سبحانه وتعالى وبعدين انتم ..ويارب يوفقني واقد اقدم حجة كويسة
وشكر خااااااااااااااص بجد من كل قلبي للأستاذ حازم النبراوي صاحب مدونة راديو العرب العرب الحر
لوقوفوا معايا من اول لحظة خطوة بخطوة
مش تنسوا تدعوا كل اصحابكم ..وتدعموني باصواتكم ..بكرة الاحد ان شاء الله الساعة 10
لميس محمود المتسابقة رقم 8 في مسابقة خاليك قدها
ودعوااااااااااااااااااااااااااااااااااتكم
القمر الساهر
بسم الله الرحمن الرحيم

الحمد الله ..
كنز من كنوز الدنيا .. وما ألطفه من كنز
الحمد الله ..
ذكر يسعد اللسان ..ويروي شراين القلب ..

ليجري في عروقنا .. الرضا ..والطمأنينة .. والأٌنس
الحمد الله..

كم مرة فزنا بهذا الكنز في حياتنا

كم من لحظات سعيدة مرت بنا .. وقلنا الحمد الله

كم من لحظات مريرة مرت بنا .. وقلنا الحمد الله

كم مرة شعرنا بمعنى الحمد الله في كل مرة نؤنس بها فؤادنا

هل فعلا نفهم معنى "الحمـــد اللــه"

في رمضان الماضي ..أرسل الله لي رسالة انا ومن كان معي لنعلم كم نحن في نعمة وكيف سيحاسبنا إذا لم نشعر بمعنى "الحمد الله"

في يوم ممطر جدا ..قارص البرودة

كنا مكلفين للذهاب لأسرة مسكينة مكونه من 8 أفراد ..

واجهنا صعوبة شديدة للوصول اليهم .. فقد كان علينا عبور طرق مغمورة بمياة الأمطار مختلطة مع مياة المجاري

وكنا نتمنى الوصول سريعا الى منزل هذه الأسرة لنحتمي من مياه الامطار

وعندما وصلنا الى الممر الاخير الى باب المنزل .. خابت أمالنا ... فالممر ما كان سوا حفرة غرقت بالماء وكان المرور عليها صعب جدا

وجدنا المنزل يصرخ ويستنجد بمن ينقذه .. فقد غرق المنزل .. وتتساقط قطرات الماء من سقف المنزل المبني من خوص ليغرق السرير الوحيد للأسرة ومرتبة الأريكة المحال الجلوس عليها بعد تدميرها بالماء .. والغريب ان الأسرة كانت تضحك وقابلونا بسرور وترحاب كأن هذا شيء طبيعي

وقفت أنا وصديقاتي بداخل كل منا شعور غريب ..واحساس متضارب

فنحن نتألم لحال هذه الأسرة المسكينة .. وسعداء بأن لنا مكان امن "منزلنا" لم تغرقه مياه الأمطار

انهينا عملنا بصمت ومضينا كل منا الى منزله .. ذهبت ركضا إلى سريري ودفنت نفسي داخل الغطاء وأنا أرتجف ..ليس لأن الجو كان قارص البرودة لا .. كنت ارتجف وأنا أقول الحمد الله الحمد الله الحمد الله ..وأتخيل وانا بين يدي الله سبحانه وتعالى وهو يقول لي ألم انعم عليكِ.. ألم أوفر لكِ الامان .. ألم أحميكي .. ؟؟ فهل شكرتي ؟؟

وجلست أفكر كيف أشكر الله .. هل بلساني .. هل بقلبي.. هل بعملي .. ؟؟


سأترك لكم هذه السيدة المسن لتعلمنا كيف نشعر بنعم الله علينا وكيف نقول الحمد الله تخرج من قلوبنا مطمئنين بها راضين عن الله

video
فلنترطب السنتنا بحمد الله وشكره ..
ولنهب جوارحنا لخدمة ديننا
ففضل الله علينا كبيرا
الحمد الله
التسميات: 18 تعليقات | edit post
القمر الساهر
بدأ الحر .. والتراب .. والخناق

وبدأت الناس تتخانق مع نفسها

واختكم عملت خناقتين في اليوم استفتحنا بخناقة وقفلنا بخناقة ..اصل انا ما بحبش احرم نفسي من حاجة ..قلت اجرب شكل خناقات الصيف

بس انا هاحكيلكم تانى خنااقة ..والاولى بعدين في مشاكسات تانية ان شاء الله

بدأت مؤشرات الخناقة ترتفع درجة حرارتها عند الساعة 1 ونص الظهر في عز المعمعة يعني

وكنت خارجة من الكورس وركبت في عربية السردين (سوري اقصد الميكروباص) ومن حسن حظي اني لاقيت كرسي فاضي

وشوية عينكم ما تشوف الا النور العربية في غضون ثواني اتكومت اجساد بشرية من كل صنف ولون كله فوق بعضه والراجل عمال يحشر فينا لحد ما حسيت ان علبة ان لو نفر زيادة ركب العلبه هاتنفجر

وفاجاه صعدت امراة ضخمة كبيرة في السن واتحشرت جوة علبت السردين والراجل يزق فيها علشان بيحاول محاولات فاشلة في قفل الغطاء اقصد باب الميكروباص ولسه بينادي دراسات دراسات دراسات .. تقريبا عنده قصر نظر ومش شايف ان العربية مافيش مكان لخرم ابرة

قامت المراة الكبيرة طلعت السرينة بتاعتها وبتطلب من واحدة تاية انها تتااااااااااااااخر شوية وتزنق نفسها جمب شاب قاعد في الكرسي اللى ورى بمعنى اصح تقد فوق رجله وتقولها ( يا ساتر عليكي ما تدخلي جوة دة زى ابنك ارحموناااااااااا)

طبعا اختكم في المواقف اللى زى دي الدم بيجري في نافوخي .. نسيت بقى علبه السردين ونسيت الحر وقلتلها يعنى ايه زي ابنها لا طبعا دة مش زي ابنها .. قامت زغرالي زغرة ناااااااااااااااارية ونفخت نفخة زودت الحر جوة علبة السردين ..

بس ايه يعني انا ولا يهمني قلتلها تعالي حضرتك جمبي بس هي مش هاتعقد فوق رجل الشاب دة تهرييييييييييييييييج..

قامت شخطتت شخطة ونطتت نطة جعلت الامراة الاخرى تقفز قفزة بجوار الشاب االلي كان متنح ومش عارف يرد ..

وجاية بقى تهجم عليا انتى مش عاجبك كلامي ولا اييييييييييييييه فيهااااااا ايييييييييييييه هو زي ابنهااااااااااااااااااااا...

قلتلها لا طبعا لا هي مامته ولا هو ابنها وحراااااااااام تعقد جمبه بالشكل دة ولا هو اصلا محرم ليها ما هو اللى مودينا في داهية كلمه ما هو زي دى كله سبهللة .. الناس بقى تهدى وتحوش استهدوا بالله يا جماعة حصل خير يا جماعة ..

انا اللى غاظنى بجد حاجتين لا 3 حجات

اولا ان يعني ايه امراة ورجل حتى لو يصغرها سنا يبقوا فوق بعض كدا ونقول وفيها ايه ما هو زي ابنها

دة الست اللي بتربي طفل يتيم اول ما بيكبر بيكون غريب عنها

ثانيا اصحاب الشأن اللى ما اتكلموش مع ان المراة التانية كانت مكسوووووووفة جدااا

ثالثا امتى ناخد بالنا اننا بشر مش سمك سردين بيحشروه فوق بعضه ويكون في رحمة شوية ..ولما نلاقي عربية كدا بدل مانبهدل بعض نستنى اللى بعدها الدنيا مش هاطير

ممكن ناس تشوف اني مكبرة الموضوع بس انا شايفة اننا في حجات كتير بنستهون بيا مع انها حرام ومن كتر ما اتعودنا عليها بينا بنشوفها عادي

ولا ايه رايكم

التسميات: 19 تعليقات | edit post
القمر الساهر
بسم الله الرحمن الرحيم


في البوست اللى فات عرضت بعض صور لفعاليات حملة النظافة في المنصورة


والنهاردة ان شاء الله هاتكلم في حاجتين .. الحاجة الاولى وجهة نظر والحاجة التانية اتفاق هايكون بينا وبين ربنا ان شاء الله
وجهة نظر :
نحن شعب تعود أن يسخط دائما على حكومته وانها هي المسئولة عن كل شيء سلبي في مجتمعنا وأنا صراحة لست ضد هذا الرأي ..فالحكومة لها يد في كل هذه السلبيات بلا شك ولكني ضد ان نجعل من الحكومة الشماعة التي نعلق عليها سلبياتنا وأخطاءنا ونخرج أنفسنا من دائرة الاتهام ونطوقها حول عنق الحكومة وأن في ذمتها كل هذه السلبيات
انا مؤمنة ان المسؤلية في عنق الحكومة والشعب معا فكلاهما مسئول

مثلا ..ما هو دور الحكومة في الحفاظ على نظافة الشوارع؟
توفير سلات القمامة على ارصفة وجوانب الطرق .. توفير العدد اللازم من عمال النظافة (وما أكثرهم) في الطرق وفي الهيائات الحكومية والمدارس ..الاهتمام بالاشجاراو ما يسمى الخط الأخضر

لكن ما أهمية كل هذا في وسط شعب ليس عنده ثقافة ولا تحضر


عندما نجد سيارة فارهة وسائقها شاب كاجوال وسيم ..فجأة يفتح نافذة السيارة ليلقي بورقة البيتزا في الشارع


فهو بكل تأكيد ليس شاب وسيم ..عذرا فهو شاب قذر


’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’


صراحة اللى خلانى اكتب في الموضوع دة حاجة فعلا استفذتني جدا


شايفين الصورة دى






وبعد تعب ساعات في تنظيف الشارع بعد ساعة واحدة تقريبا عاد المنظر الى هذا الشكل!!!!!!!!!!!!!




والاكتر من كدا قدام عنينا بنكون لسه منظفين حوالين السلة ويادوب بنرجع بظهرنا وبنلف لاقينا راجل بيرمي القمامة على انها كرة سلة يا تقع جوة الصندوق يا تتبعتر حواليه وهو شاااااااااااايفنا واحنا بنظف وشايف العمال .. بزمتك دة يتقال عليه ايه ؟؟؟؟؟؟؟؟؟؟؟

والحكومة تعمل ايه في شعب لا يؤمن ان الشارع دة ملكه وملك غيره
المضحك المبكي الدول المتحضرة مثلا زى اليابان ما فيش حاجة اصلا اسمها عمال نظافة حتى في المدارس الابتدائي فكل شخص عارف مسئوليته اتجاه الشارع والمكان اللى قاعد فيه
علشان كدا انا بقول موضوع زى نظافة بلدنا دة مش مسئولية حكومة بس مهما عملت الحكومة مش هاتحقق حاجة لو فضل الناس بالثقافة دي
بجد محتاجين شوية ايجابية لا مش شوية محتاجين 700 مليون طن ايجابية (مش عارفة اشمعنا 700 بس هو كدا)
الحاجة التانية والأهم بقى الاتفاق
بما انى واثقة ان المدونين أو قراء المدونات من أرقى العقول
وبما اني مؤمنه ان فعلا اهل التدوين واصحابه من أكثر الناس تعلقا بالايجابية ومؤمنين بفكرة تغيير انفسنا وغيرنا للأفضل
حبيت نتفق على اتفاق يكون بينا وبين ربنا

1- واحنا ماشيين في الشارع ومعانا منديل ورق أو كيس شيبسي أو حتى غلاف تشيكلتس... منرميش حاجة منهم فـ الشارع، لما نخلص كيس الشيبسي، نطبقه ونحطه فـ جيبنافي شنطتنا ولما نروح البيت نرميه فـ كيس الزبالة ولما كيس الزبالة يتملي ،،، أخ،،، تظهر المشكلة هنا ،،، مش كلنا بيعدي عليهم زبال ياخد كيس الزبالة ومش كلنا جمبهم حاوية زبالة يقدروا يرموا فيها الكيس،،، خلينا فـ اللي بيعدي عليهم الزبال أو جمبهم حاوية يقدروا يرمو فيها الكيس،،، لما الكيس يتملي إما الزبال هياخده أو انتم هترموه فـ أقرب حاوية من حاويات الزبالةالمهمواحنا ماشيين فـ الشارع، منرميش أي حاجةممكن كمان نصبر على كيس الشيبسي الفاضي اللي طبقناه فـ جيبنا لحد منلاقي مكان نرميه فيه

2- اللى عندهم عربيات في سلات شيك قوي صغيرة ياريت نشتري منها ونحطها في العربية او على الاقل يكون معانا كيس بلاستيك نرميفيه كل اللى مش محتاجينه ولما نوصل لاول سلة قمامة نرمي الكيس فيه
3- اللي يشوف حد بيرمي حاجة يفهمه بالذوق ان دة مش صح في ناس ممكن تتكسف مع ان دى مافيهاش كسوف بس ممكن بحركة تعملها تحرج اللى قدامك يعنى واحد صاحبك ماشي ورمى منديل تقوم انت تشيله وترميه في امكان المخصص ساعتها يمكن يتكسف على دمه
لو كل واحد بدا بنفسه وباهله وباصحابه شوية شوية هنلاقي نفسنا كلنا اتغيرنا وبقينا شعب متحضر... الموضوع بجد سهل جدا
ما هو احنا ما نحلمش اننا نكون شعب ليه مكانة في المجتمع واحنا عقولنا غير نظيفة (زبالة)

التسميات: 24 تعليقات | edit post
القمر الساهر
منذ فترة قصيرة انطلقت حملة على الفيس بوك وهي كانت حلم لمجموعة من الشباب هدفها هو عمل حملات مكثفة لتزيين وتنظيف شوارع مصر الحبيبة لجعلها اجمل عروسة بتكاتف كل فئات الشعب وتغير السلوكيات الغير حضارية والحملة نالت تغطية اعلامية على نطاق واسع من وسائل الاعلام المرئي والمقروء
وكان يوم الجمعة الموافق 10-4-2009 هو بداية انطلاق الحملة في أغلب محافظات مصر ..وحققت نجاح مبهر خاصة في مصر الجديدة والدقي والمنصورة والشرقية وبني سويف ومدينه نصر وبما اني من أهل المنصورة ومن الناس اللى ربنا اختارهم يكونوا من المشاركين فى الحملة فحبيت انقل ليكم بعض صور هذا اليوم الذي افتخر به جدا واعتبره من أعظم أيام حياتي التى يجب ان تدون الحمد الله رب العالمين

في البداية اتفقنا على المكان الذي سيتم فيه الحملة وتم الاتفاق على شارع الترعة واتفقنا على المعاد وكان الساعة 9 صباحا واللبس كان موحد تشيرتات مكتوب عليها (صناع الحياة) وجهزنا الادوات اللى هانستخدمها من اكياس للقمامة ومقاشات وجوارب ودهانات للرصيف وورود لزرعها على جوانب الطريق طبعا مع مساندة عمال الحي ..وسيارات لرش الماءهنا الصورة قبل التنظيف ملاحظين مكتوب ايه على الصندوق!!!!!

وهنا رغم وجود صناديق خاصة للقمامة ..لم يلتزم بها

وهنا فريق الشباب وهو بيشتغل بايديه ولاحظوا الورود بجد كانوا رائعين قد ايه اشتغلوا بحب وبايمان بالفكرة وبتواضع شديد ربنا يبارك فيهم





وهنا ايضا كانت مشاركة البنات في الحملة


وهنا مساعدة عمال النظافة اللى كنا في اليوم دة بنشتغل كلنا مع بعض

وهنا العمال بيدهنوا الرصيف


والشباب كمان بيدهنوا معاهم الرصيف وجذوع الشجر

وهنا بعد التنظيف نسقي الزهور


ومن الايجابيات اللى حصلت اثناء عملنا وجود واحدة من البائعات كانت تراقبنا وبعدين قالت لينا انا كنت برمي في الشارع بس لما شوفتكم هاوعدكم مش هارمي تاني... ومن اجمل اللى حصل كمان ان كان في طفل وطفلة اول ما شافونا نزلوا وشاركوا معانا


وهنا بعد عمل دؤوووب واخيييييرا الطريق بعد الابادة اقصد التنظيف







الى هنا انتهت الصور ولكن لم ينتهي الطريق فمازال هناك الكثير ,, لتغير سلوكيات خاطئة وتطوير عقول جيل صغير سيصبح غدا كبيروفي النهاية أحب اقول كلمه شكر وتقدير واحترام للشباب والبنات الذين حملوا الفكرة والحلم على اكتافهم ليرسموه على ارض الواقع

ولم ينتهى الكلام فلي عودة ان شاء الله لمناقشة الظاهرة بعد هذا اليوم بساعة واحدة فقط؟؟؟

القمر الساهر


على مكتبي وتحت الضوء الخافت في مكتبتي سابحة بين أوراق كتابي ..شردت بفكري بعيدا في موقف حل بي بالأمس القريب ..عندما سألتني احدى جاراتي وصوتها يرتجف كأنها تخجل من سؤالها ( انتى عندك كام سنه ؟) فأجبتها (26 سنه) لأسمع بعدها شهقة عالية من جارة اخرى وتقول (ياااااااااه 26 دة انتي كبرتي!!) -- كنت عايزة ا لحقها بكوباية ماية احسن تروح فيها وعجي--- وتتبعها بعدها بدعوة (ربنا يكرمك بابن الحلال وتشوفي الغلب اللى موريهولى ابني محمد ) وتتنهد تنهيدة حارة كادت تحرق المكان (دة مورينى الويل ترجيع وسخونية واسهال وكل يوم بجري بيه على الدكاترة) -- انا ذنبي ايه في القرف دة-- كأنها تخشى ان ارشق ابنها عين -- صراحة انا كنت عازة ارشقها هي على قلة ذوقها--
ضيقت الناس حولي الخناق .. أرى في أعين البعض الشفقة .. وأرى في أعين آخرين الشماتة وكل هذه الأعين تقتلني .. ماذا أفعل .. وما ذنبي أنا .. هل انا المسئولة .. رحماك ربي ..
أختي الصغيرة تقطع حبل تفكيري وتقرع على باب غرفتي ..ولأجد في عينها فرحة وفي صوتها لهفة .. (عريس عريس) نظرت اليها بصمت وصرخ صدى صوتي داخلي ( هي اختى قالت عريس ولا عفريت ؟؟؟ )

لا أحد يشعر بالتوتر الذي تشعر به الفتاة في مثل هذه الموقف .. ليس توترا بسبب عدم ثقتها في نفسها .. ولكن توتر من هذه الخطوة التى على أساسها ستبني عليها حياتها كلها وتتلاطم أسئلة كثيرة
هل هو الرجل المناسب هل هو جاد هل سيكون صاحب دين وخلق هل سيكون كريم في مشاعره معي هل سيراعي الله في علاقتنا وووووووووو
حتى أصرخ وأقول (لاااااااااااا مش عايزة اتجوز) حتى اصطدم في حائط العنوسة ..لأقول
(خلاص هاتجوز انا موافقة مش مهم أقتنع المهم أحمل لقب متزوجة مش عااانس)

في الحقيقة
سادت فكرة خاطئة بين الفتيات المقبلات على الزواج وهي (أول عريس يدق الباب ويكون جاد تراه الفتاه هو زوج المستقبل) هروبا من شبح العنوسة الذي يطاردها حتى في أحلامها وتحارب الفتاة كثيرا في انجاح هذه العلاقة حتى لو وضح امامها عيوب الطرف الاخر .. متبعة مقولة
(القسمة والنصيب) (ظل راجل ولا ظل حيطة) (بكرة هايتغير ) (مراية الحب عامية)



أذا كنتي من هؤلاء الرافعات لمثل هذه الأقاويل اسمحي لي أن أقول لكِ أنك مخطئة
أذا كان الجواز قسمة ونصيب فلمااذا شرعت الخطوبة؟؟ ظل راجل ولا ظل حيطة .. اسمحي اقول ان ظل الحيطة احيانا بيكون أفيد واحسن من ظل راجل مايل بكرة هايتغير .. مافيش حد بيتغير وهذا امل واهن وحلم ضائع لن تجديه مراية الحب عامية .. بكرة هاتفتح وهستجدي كوارث ولن تجدي طريق سوا التأقلم والتعايش مع هذه الكوارث
الخطوبة لكي يتعرف كلا الطرفين على بعضهما ... والعيوب فيها تكون ظاهرة كالشمس في كبد السماء ولكن نحن من ندعي اننا لا نراها على أمل بعد الزواج ستكونِ قادرة على تغيرها أو لأنكِ تحبين هذا الشخص جدا وتتعامي عن رؤية عيوبه أو تخافي من العنوسة..


كلنا نحلم بالزوج الحنون الخلوق لكن الزواج وبناء أسرة كالبناء الشاهق يحتاج إلى أساس متين
فإذا اختارت اساس قوي ستبني عليه اسرتك الجميلة القوية في أمان ان شاء الله ,, وإذا اخترتي أساس واهن ضعيف ..فسينهار عليكِ وعلى أسرتك وتدفنون تحت الأنقاد .. الله يرحمكم
فأرمي هذه الأقاويل خلف ظهرك .. وأعلني أنك لست مريضة بفوبيا العنوسة
ولن تتزوجي أول من يدق بابك إلا من كان يستحقك ويستحق أن يكون أب لأولادك
القمر الساهر
لم أكن أريد أن أخربش على صفحات مدونتي هذا الموضوع الان (علشان محدش يقول عليا كئيبة) لكن فاض بي الكيل فهرولت الى جهازي الحبيب لأرمي فوقه همومي.. فاقرؤا معي (واللى عنده الضغط بلاش يقرا صحتكم غالية)
*** كانت تقف بإطلالتها الطفولية وهي صاحبة الـ 15 ربيعا أمام نافذة منزلها..لترى طفلة أكثر براءة منها لم تتجاوز 10 السنوات ..لم تكن تعرفها ولأول مرة تراها فتنادي عليها من وراء النافذة لتخبرها انها تريد منها أن تشتريلها شيئا من البقالة المجاورة ..وببراءة الطفولة توافق الطفلة وتذهب اليها لتقبض عليها الطفلة الاولى وتدخلها غرفتها وتقوم بتكتفها وخنقها .والعجيب انها خرجت واتصلت بالشرطة لتخبرهم بجريمتها.. (والسبب انها تريد ان تدخل السجن هربا من أبيها القاسي)
*** خال اعتدى على ابنه اخته التى تبلغ 14 عام لانها تثيره
*** رجل تعدى ال 60 عاما مع زوجته قاما بفتح موقع اباحي على الانترنت على شكل جمعية ليستمتعوا بزوجات وازواج بعضهم البعض مع تصويرها واعطاء شريط فيديو للطرفين للذكرى السعيدة

عايزين كمان طيب كمان
*** سواق نصف نقل اتجه بسيارته الى فتاه وقام بشدها من منطقة حساسة في جسمها وسقطت على الارض من شدة الألم ووقف ضاحكا سعيدا بمنظرها
*** شاب على دراجة نارية قاد الدراجة على سرعة عالية وقام بخطف حقيبة يد لسيدة كانت تقف على الشارع ليسرقها لعله يجد في حقيبتها ثمن قالب حشيش
*** مريضة نفسية تغرق ابنتها في بانيو الحمام
*** مريض نفسي يذبح والدته ثاني أيام العيد ............ (حاسة بيكم دلوقتى اكيد بتصوتوا)
عناوين وقصص نكاد نراها ونقراها كل يوم وتتناقلها وسائل الإعلام المرئية والمسموعة والمقروءة
جرائم .. وسرقات .. وتحرشات ... مخدرات ... في كل مكان


أصبحت الحوادث والجرائم سلعة الأن تدر الارباح على المسوقين لها ..
أصبحت مجلات وجرائد تطبع اسبوعيا متخصصة فقط في الحوادث ..
ومنتديات متخصصة للأخبار الساخنة والفضائح والقضايا والجرائم
أصبح عالم مثير


أصبحنا نخاف ان نمشي في الشارع خوفا من التحرش او السرقة أوالقتل
هل فقدنا الأمان في مجتمعنا؟
لماذا انتشرت الجريمة بهذا الشكل .. ؟

أكيد اننا بشر وبيننا الخير والشر .. لكن لماذا أصبحت الجريمة ظاهرة الى هذا الحد
لدرجة أننا عندما نسمع عن حوادث ..أًصبحت شيء عادي
هل تعودنا على الجريمة ونراها امر مسلم بها ؟
هل مسموح بوجود مبررات للجريمة ؟

يخطر دائما في بالي سؤال هل هؤلاء المجرمين سواء داخل السجون او خارجها نادمون على ما يفعلون ؟
هل هم مرضى نفسيين ؟
ام انهم أشخاص انعدمت عندهم الأخلاق؟
أم ضغوط حياة اجتماعية ومادية ؟
دائما نسمع ان الجاني اكيد مصاب بمرض نفسي لانه لا يوجد عقل بشري يستوعب وحشية ما فعله الجاني
لكن في رايي السبب الأول للجرائم ليس المرض النفسي . ولا الأحوال الاقتصادية بل

انعدام الأخلاق والبعد عن الله .. والمخدرات التى هي بداية طريق الموت ...
أصبحنا فعلا في زمن انحلال أخلاقي كبير ..

واسمعوا معي هذا التصريح العجب العجاب الذي صرحت به أيناس الدغيدي في رؤيتها( المضمحلة ولن أعتذر) لحل الفساد الأخلاق ظاهرة التحرش والاغتصاب ترى الحل ---هو في تصريح بيوت الدعارة علشان الناس تروح تزني وهما مطمأنين وعارفين هيلاقوا ناس زيها فين بدل ما يروحوا يغتصبوا ناس بريئة !!!!!!!!!!!!!---(يا حلاوة يا ولاد)
مثل هؤلاء المثقفين ( في رايي لا يعلمون شيئا عن الثقافة) يرون الحل هو تصريح الفساد ..
يعني اللى عايز يكون فاسد يروح اماكن مصرحة يفسد فيها قدام عنينا أحسن ما يفسد من ورانا !!!!!!!!!!!!!!!!!!!!!
مثلا .....
بيعالجوا الفساد بفساد أكبر ومجااااهرة بالفساد أمام الله

استغفر الله العظيم
لا تعليييييييييييييييييييييييييق
وأرسل نداء الى وسائل الأعلام بكل انواعها لا أعلم هل ستوافونني على هذا النداء أم لا ..
اقول لهم الرحمة رفقا بنا .. كفانا خوفا رعبا ... كفانا ان نرى دماء وصرخات ودموع ..
لا أفهم ما هدفهم من نشر هذه الكوارث والجرائم ..؟ لا ارى منها اى جانب ايجابي او توعية الا في القليل منها لكن ارى سلبياتها كثيرة
1- فقدنا الثقة في كل من حولنا حتى في أهلنا وفي أنفسنا وعندما نفقد الثقة اذن يمرض قلبنا بالخوف واذا أصبحنا نخاف من كل شيء فقدنا الأمان !!!!
2- أصبنا بالاكتئاب ألا يكفينا ما نحن فيه كل يوم من ضغوطات في كل أمور الحياة؟
3- أرى أنها تضيء طريقا لمن تسول له نفسه على الشر فيكرروا الجرائم التى سمعوا عنها أو قرؤوها ويتجنبوا الأخطاء الى وقع فيها غيرهم
4- بدأ الناس يرون ان أسهل طريق والحل الأمثل هو القتل او المخدرات ( اشمعنا انا يعني ما كل الناس كدا )
5- للأسف بدأنا نتعود على الجرائم في البداية كنا نبكي وننهار ثم نقول لا حول ولا قوة إلا بالله الآن نقرا ونقلب الصفحة كان شيئا لم يكن

ربما يكون كلامي غير منسق .. ولكنها صرخة ألم
رافعة يدي تضرعا لله أن تعود أخلاقنا وقيمنا ومبادئنا وتهدأ أمواج الخوف التي تلطمنا
وان نصل إلى بر الأمان

التسميات: 7 تعليقات | edit post
القمر الساهر
بسم الله الرحمن الرحيم
السلام عليكم ورحمة الله وبركاته

كنت جالسة بعد الفجر .. أقلب حبل أفكاري ::: وفي نفس الوقت أبعثر نظراتي على صفحات الانترنت .... وأفكر ................أين أنا ؟,, وأين أريد أن أصل ؟,, أبحث داخل أعماقي عن شيء أحبه ..لأصنع منه هدفي ..,, حتى لمع في رأسي ما أحب وكان شيء بسيط .. وتخيلت هكذا سأكون وسأسير .. وابتسمت !!!

وفي نفس اللحظة وقع نظري على هذه المقولة " الخطر اأعظم لمعظم الناس ليس في أن يكون هدفنا كبيرا عاليا لدرجة صعوبه تحقيقه ,,وإنما في أن يكون بسيطا متواضعا يسهل تحقيقه ..!" نعم الخطر أن نرضى بالأحلام والأهداف المتواضعة مع أن قدرة معظمنا كبيرة
وهنا توقفت .. وتلاشت إبتسامتي وبدأت في قراءة هذه السطور مقال لأستاذ كريم الشاذلي في جريدة الدستور بتاريخ 25/3/2009 منقولا من مدونته

فعلمت أنه لابد لي من هدف لكن ليس كأي هدف ..بل هدف يحفزني على العمل والاجتهاد لأشعر بذاتي ..وأشبع كياني ..وأسمو بنفسي. فالحياة بلاهدف حياة بلا هوية

القمر الساهر
اشتقت إليك ..اشتقتك الى دفئ عينيك..
اشتقت إلى خشونة صوتك يوقظني كل صباح اشتقت الى حضنك يداعبني كل مساء ..


اشتقتك الى شعرك الأبيض الغزير... الذي زينك بالنقاء والصفاء كقلبك
اشتقت الى لون عينيك المشمشي ... تلك العيون المرحة الطيبة


أصبحت أرى الهواء لا يحمل سوى رائحتك ليذكرني بك..

ما زلت أتذكر أخر يوم رأيتك فيه ولم أكن أعلم أنه آخر يوم

ما زلت أتذكر كيف كنت في هذا اليوم الحزين ترتجف وتهرب بعيدا .. حتى رايتني وارتميت في أحضاني ..

تمسح رأسك بحنان في كتفي وتنظر إليّ كنظرة الطفل إلى أمه ..

ما زلت اتذكر تلك النظرة الحزينه في عينك التى لم أكن وقتها أعرف سرها

ما زلت أتذكر في هذا اليوم الحزين .. إلحاحك على ان تكون بجواري .. تلاحقني بنظراتك .. تقف كحارسي الملاك ..لا تريد سوى أن تكون بجانبي

ما زلت أتذكر في هذ اليوم الحزين أنى ولأول مرة شعرت بحب جاارف اتجاهك .. تنتابنى رغبه شديدة في أن أضمك وأقول لك :: سامحني سامحنى على كل لحظة نظرت فيها إليك بقسوة ..سامحنى سامحنى على كل لحظة تركتك فيها وحيدا .. سامحنى سامحني على كل لحظة أزعجتك فيها


لم أكن أعلم ان بداخلك كل هذه الطيبة .. لم أكن أعرف أن بقلبك كل هذا الحنان ..

ولم أجد وقتها تفسيرا لشعوري هذا

إش إِش


لم أكن أعلم أنك سترحل سريعا .. لم أكن أعلم أن محاولتك المستميته في أن تشعرني بحبك ذاك اليوم هو شعورك بأنك سترحل في هذا اليوم الحزين
لم أكن أعلم ان أخر نظرة إليك وأخي يحملك بين ذراعيه كطفل ملائكي ليأخذك بعيدا ويردم علي شعرك الأبيض النقي التراب
قطى الراحل .. وداعا
القمر الساهر


بسم الله الرحمن الرحيم
السلام عليكم ورحمة الله وبركاته


ماذا دهاه ؟ هل سار في طريق الموت وانهار عليه عامود الكهرباء ( دوس هنا و شوف الحادثة!! اهرام جمهورية طنطا ) .. ولربما اكل بالبرتقالة على دماغه من يد زوجته الحبيبة (دوس هنا وشوف اخرة اللى ما بيسمعش الكلام) ...


لالالالالالا .. أكيد لم يشرب كوب النسكافيه في الصباح فأصبح كحالي


كب كب كب زززززززززززززز طق طق طق


مطارق تضرب رأسي , أزيزا ينخور داخل جدران عقلي

أكاد أرى أفكارى متزاحمة متضاربة مختنقة , تهرول في وسط الزحام تتسارع تتشاجر (حاسب حادثة) باحثة عن طوق نجاه ينتشلها من وسط هذه الكراكيب داخل عقلي


أتخيل عقلي الان كغرفة الأطفال الصارخة الالوان ... والالعاب مبعثرة هنا وهناك ... وألواح من الأخشاب ...وسرير رٌدِم من كثرة الأشلاء ... وشرفات مغلقة لا تسمح بتنفس الهواء .. كفى كفى
احتاج فورا وبالبلدي الفصيح مقشة وفرشة وجروف وصندوق (وياريت كمامة علشان التراب) لكي أكَّوِم كل هذه الكراكيب وألقي بها داخل الصندوق ..وأصلح الدمار الذي حل بعقلي (الغرفة)

في الحقيقة أحتاج إالى أن أٌلملم أفكاري وأرتب دفاتري وأفك نزاع أحلامي .. لأرسى بأهدافي الى شط الأمان


وكل هذا بسبب أنني لم أشرب كوب النسكافيه في الصباح

معلومة
الكلام المظلل دى روابط اضغطوا عليها
القمر الساهر


بسم الله الرحمن الرحيم


السلام عليكم ورحمة الله وبركاته


مع إنطواء ورقة الأمس, ومع إشراقة يوم جديد, ومع زقزقة عصافير الصباح, ومع تلاعب نسمات الهواء مع أوراق الأشجار, ومع تناغم صفاء السماء وبديع الورود , ومع أول رشفة من كوب النسكافيه الساخن

:::::::::::::::::::::::::::::::

أفتح مٌكنتي , لتشرق مع شٌرفات جدران المدونات , لعلي اقتبس من ضي أقماركم,, ما يضيء لي دربي

وأحكي مع قمري ,, فحكياتي مع قمري كثيرة

وأتركه يبعثر ضيه من بين الشرفات , ليضيف نسمات من الدفء والحنان



وبسم الله ابدا فتح شرفتي, وعلى ربي توكلت ,, وعلى الحبيب محمد صلى الله عليه وسلم صليت



ومع أخر رشفة من كوب النسكافيه

انتظروا حكاوي مع القمر الساهر