القمر الساهر
بدأ الحر .. والتراب .. والخناق

وبدأت الناس تتخانق مع نفسها

واختكم عملت خناقتين في اليوم استفتحنا بخناقة وقفلنا بخناقة ..اصل انا ما بحبش احرم نفسي من حاجة ..قلت اجرب شكل خناقات الصيف

بس انا هاحكيلكم تانى خنااقة ..والاولى بعدين في مشاكسات تانية ان شاء الله

بدأت مؤشرات الخناقة ترتفع درجة حرارتها عند الساعة 1 ونص الظهر في عز المعمعة يعني

وكنت خارجة من الكورس وركبت في عربية السردين (سوري اقصد الميكروباص) ومن حسن حظي اني لاقيت كرسي فاضي

وشوية عينكم ما تشوف الا النور العربية في غضون ثواني اتكومت اجساد بشرية من كل صنف ولون كله فوق بعضه والراجل عمال يحشر فينا لحد ما حسيت ان علبة ان لو نفر زيادة ركب العلبه هاتنفجر

وفاجاه صعدت امراة ضخمة كبيرة في السن واتحشرت جوة علبت السردين والراجل يزق فيها علشان بيحاول محاولات فاشلة في قفل الغطاء اقصد باب الميكروباص ولسه بينادي دراسات دراسات دراسات .. تقريبا عنده قصر نظر ومش شايف ان العربية مافيش مكان لخرم ابرة

قامت المراة الكبيرة طلعت السرينة بتاعتها وبتطلب من واحدة تاية انها تتااااااااااااااخر شوية وتزنق نفسها جمب شاب قاعد في الكرسي اللى ورى بمعنى اصح تقد فوق رجله وتقولها ( يا ساتر عليكي ما تدخلي جوة دة زى ابنك ارحموناااااااااا)

طبعا اختكم في المواقف اللى زى دي الدم بيجري في نافوخي .. نسيت بقى علبه السردين ونسيت الحر وقلتلها يعنى ايه زي ابنها لا طبعا دة مش زي ابنها .. قامت زغرالي زغرة ناااااااااااااااارية ونفخت نفخة زودت الحر جوة علبة السردين ..

بس ايه يعني انا ولا يهمني قلتلها تعالي حضرتك جمبي بس هي مش هاتعقد فوق رجل الشاب دة تهرييييييييييييييييج..

قامت شخطتت شخطة ونطتت نطة جعلت الامراة الاخرى تقفز قفزة بجوار الشاب االلي كان متنح ومش عارف يرد ..

وجاية بقى تهجم عليا انتى مش عاجبك كلامي ولا اييييييييييييييه فيهااااااا ايييييييييييييه هو زي ابنهااااااااااااااااااااا...

قلتلها لا طبعا لا هي مامته ولا هو ابنها وحراااااااااام تعقد جمبه بالشكل دة ولا هو اصلا محرم ليها ما هو اللى مودينا في داهية كلمه ما هو زي دى كله سبهللة .. الناس بقى تهدى وتحوش استهدوا بالله يا جماعة حصل خير يا جماعة ..

انا اللى غاظنى بجد حاجتين لا 3 حجات

اولا ان يعني ايه امراة ورجل حتى لو يصغرها سنا يبقوا فوق بعض كدا ونقول وفيها ايه ما هو زي ابنها

دة الست اللي بتربي طفل يتيم اول ما بيكبر بيكون غريب عنها

ثانيا اصحاب الشأن اللى ما اتكلموش مع ان المراة التانية كانت مكسوووووووفة جدااا

ثالثا امتى ناخد بالنا اننا بشر مش سمك سردين بيحشروه فوق بعضه ويكون في رحمة شوية ..ولما نلاقي عربية كدا بدل مانبهدل بعض نستنى اللى بعدها الدنيا مش هاطير

ممكن ناس تشوف اني مكبرة الموضوع بس انا شايفة اننا في حجات كتير بنستهون بيا مع انها حرام ومن كتر ما اتعودنا عليها بينا بنشوفها عادي

ولا ايه رايكم

التسميات: edit post
19 Responses
  1. الحمدلله لسه ماتحشرتش ف ميكروباظ لحد دلوقتي كل الي بركهم فيهم نسبة معقوله :D

    بس ع فكره انتي عندك حق دي حاجه مستفزه جدا اما احنا نستهين بالصغائر كده

    ربنا يهدي يارب

    ويبعد عنك كل الخنقات والذي منه :)


  2. Ahmed Talk Says:

    هو ده فعلا اللي جابنا ورا


  3. السلام عليكم
    انا معاكى وفعلا دى حقيقه فى حاجات بنفضل نتغاضى عنها لما بقت بتخنقنا لأنها بعد ماكانت غريبه وتغاضينا عنها اصبحت عاده وطبيعيه
    طبيعى ان يكون الميكروباص زحمه والتباع ينادى ويقول كمان
    طبيعى اننا نتخانق فى الشارع لأن انعدم مننا الأخلاق
    نسينا قول رسولنا الكريم عندما سأل أصحابه من القوى فيكم فكلهم اجمعوا على من يهزم الأخرين ولكن رسولنا الكريم قال من يملك نفسه عند الغضب
    نسينا تقاليدنا وعاداتنا
    نسينا مصريتنا وشرقيتنا وجرينا ورا الموضه وحاجات غربيه غريبه علينا وعلى دينا الإسلامى وحتى المسيحى


    بصراحه الموقف ده بيتكرر كل يوم ومش عارفين هيفضل يتكرر لغاية امته وه لأننا فعلا ساكتين لأن دايما اصحاب الشأن مش بيتكلموا زى ما قولتى


    لكى كل التحيه وبلاش خناقات تانى بدل ما تروحى القسم :)


  4. thunder Says:

    معتقدتش ان دا جديد علينا انتى عارفه السرفيس عامل ازاى فى المنصورة عموما لكن بجد معاكى حق ان احنا بنتهونا فى ابسط حقوقنا وبنخالى التابعين يزيدوا فيها ولافعالهم وكمان لان الناس مستعجله فيبوزدها باله على العموم بوست جميل جدا


  5. موني .. ربنا ما يكتبها عليكي دى حاجة مقرفة وخاصة في الحر

    وربنا يهدي الجميع وبجد بكون اسعد واحدة لما تكونى اول المعلقين


    تسلمي


  6. استاذ احمد
    اضم صوتي فعلا لك

    استهتارنا دة اللي مخلينا ما بنقدنش خطوة شرفتني


  7. استاذ احمد
    اضم صوتي فعلا لك

    استهتارنا دة اللي مخلينا ما بنقدنش خطوة شرفتني


  8. ابن مصر

    وعليكم السلام ورحمة الله

    كترالغط العين بتتعود عليه .. ودة مؤشر لبداية انعدام كل شيء جميل ..

    لازم نرجع تانى لاخلاقنا وقيامنا ويكون عندنا وعي مش بس كلام

    كلامك 100 100 منور


  9. thunder

    مشكلة زحمة الميكروباص مالهاش حل وصعب يكون ليها الحل

    المشكلة الحقيقية فعلا مش زحمة السرفيس المشكلة في التصادم والتلاصق اللي بيحصل بين البنات وااولاد ونقول دة عادى زى ابنها زي اخوها .. استهتار كمان بابسط امور الفطرة .. وعدم احترام لادمية الانسان

    شكرا لك منوور والبوست جميل بردك وكل المنورين


  10. انا موافقك علي كلامك يا حبيبتي بس المشكلة في الميكروباص ان الطلب اكتر من العرض الناس كلها مستعجلة و السواق ما يصدق ده جزء من ازمة اللد للاسف اللي في كل حاجة الطلب اكتر من العرض


  11. ازيك يا قمر يا ساهر
    تحياتى
    الحقيقه يا قمر ان مواصلة الدراسات دى صعبه جدا وخصوصا تقعد فى طلخا عشان تركب ولا تلاقيش ولو لقيت ميكروباص تلاقى التدافع عيه صعب قوى
    كمان المرور شال ايده من حكاية عدد الركاب وساب بتوع الميكروباص يتحكموا فينا ويعبونا زى السردين وطبعا الغلط مش على بتوع الميكروباصات الغلط على بتوع المرور
    عشان احنا مش بنى آدمين
    تحياتى


  12. مدونتك فعلا رائعة

    انا معاكي طبعا فى كل اللى انتى قولتيه

    هو زى ابنها وهى زي امه

    وسمك لبن تمر هندي بعدين باظت الدنيا كلها

    الموضوع اكثر من رائع

    لكن فين الخناقة الاولى؟؟
    انا هستنى الخناقة الاولى علشان اعرف تفاصيلها

    تحياتى وتقديري واحترامي


  13. بالظبط,
    كلامك مظبوط ميه الميه,
    فعلا هو ده اللي قصدته انا في بوستي اللي انتِ قراتيه,
    نورتي مدوناتي وفي انتظار طلت نورك دايما.


  14. أم أحمد

    الطلب اكثر من العرض .. مشكلة ما نقدرش حلها بسهولة بس على الاقل يكون في احترامشوية مش سلطة هي ونحترم نفسنا

    منوراني يا غالية يارب دايما


  15. استاذ فشكول

    منور ..

    والله هي الازمة كدا كدا موجودة والكل بيتحمل مسئوليتها

    امرور - السوائقين- الناس للى تقبل تتعامل كدا

    وهارجع تانى وعاشر اقول الازمة بجد اننا بنتكركب فوق بعض بنات على ولاد وما حدش عنده دم يحس ان دة غلط

    منور

    تحياتى


  16. أ حازم

    انا يشرفني وجود حضرتك

    وزي ما حضرتكقلت سمك لبن تمر هندي

    بجد بحس انالحياء انعدم وكمانمن البنات اكتر

    انت غاوي تسمع خناقات ولا ايه ههههههههههه .. لا خلاص بقى ما انا سامحت سواق التاكسي قلبك ابيض

    منور ويارب دايما


  17. سلمى

    دة نورك .. ومدونتك جميلة ..

    لما قريت البسوت عندك قلتالحمد الله لسه فيناس عندها شوية حياء ودم

    وسعيدة بوجودك معايا ويارب دايما

    منورة حبيبتى


  18. كلامك صح يا ابنتي مجبناش ورا إلا كلمة وماله معلش
    و إيه يعني

    داه زي ابنها ودي أد أمه

    حرمات مالهاش حل

    صغائر أمور كان الصحابة زمن رسول الله يعدونها من الكبائر

    ربنا يعصمك من ركوب الميكروباص والله انتي واللي زيك يا بنتي


  19. هيه أكثر حاجة مضايقاني كلم
    زي
    زي ابنك
    زي أخوكي
    زي أبوكي
    زي أمك
    زي جوز .. وزي مراتك مهو ده اللي ناقص

    بس اللي كان يستحق الخناقة
    سواق الميكروباص
    أنا لما بتحط في موقف زي ده
    بتخانق معاه هوه

    الحمد لله مبتحطش فيه كثير يعني