القمر الساهر
بسم الله الرحمن الرحيم


في البوست اللى فات عرضت بعض صور لفعاليات حملة النظافة في المنصورة


والنهاردة ان شاء الله هاتكلم في حاجتين .. الحاجة الاولى وجهة نظر والحاجة التانية اتفاق هايكون بينا وبين ربنا ان شاء الله
وجهة نظر :
نحن شعب تعود أن يسخط دائما على حكومته وانها هي المسئولة عن كل شيء سلبي في مجتمعنا وأنا صراحة لست ضد هذا الرأي ..فالحكومة لها يد في كل هذه السلبيات بلا شك ولكني ضد ان نجعل من الحكومة الشماعة التي نعلق عليها سلبياتنا وأخطاءنا ونخرج أنفسنا من دائرة الاتهام ونطوقها حول عنق الحكومة وأن في ذمتها كل هذه السلبيات
انا مؤمنة ان المسؤلية في عنق الحكومة والشعب معا فكلاهما مسئول

مثلا ..ما هو دور الحكومة في الحفاظ على نظافة الشوارع؟
توفير سلات القمامة على ارصفة وجوانب الطرق .. توفير العدد اللازم من عمال النظافة (وما أكثرهم) في الطرق وفي الهيائات الحكومية والمدارس ..الاهتمام بالاشجاراو ما يسمى الخط الأخضر

لكن ما أهمية كل هذا في وسط شعب ليس عنده ثقافة ولا تحضر


عندما نجد سيارة فارهة وسائقها شاب كاجوال وسيم ..فجأة يفتح نافذة السيارة ليلقي بورقة البيتزا في الشارع


فهو بكل تأكيد ليس شاب وسيم ..عذرا فهو شاب قذر


’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’


صراحة اللى خلانى اكتب في الموضوع دة حاجة فعلا استفذتني جدا


شايفين الصورة دى






وبعد تعب ساعات في تنظيف الشارع بعد ساعة واحدة تقريبا عاد المنظر الى هذا الشكل!!!!!!!!!!!!!




والاكتر من كدا قدام عنينا بنكون لسه منظفين حوالين السلة ويادوب بنرجع بظهرنا وبنلف لاقينا راجل بيرمي القمامة على انها كرة سلة يا تقع جوة الصندوق يا تتبعتر حواليه وهو شاااااااااااايفنا واحنا بنظف وشايف العمال .. بزمتك دة يتقال عليه ايه ؟؟؟؟؟؟؟؟؟؟؟

والحكومة تعمل ايه في شعب لا يؤمن ان الشارع دة ملكه وملك غيره
المضحك المبكي الدول المتحضرة مثلا زى اليابان ما فيش حاجة اصلا اسمها عمال نظافة حتى في المدارس الابتدائي فكل شخص عارف مسئوليته اتجاه الشارع والمكان اللى قاعد فيه
علشان كدا انا بقول موضوع زى نظافة بلدنا دة مش مسئولية حكومة بس مهما عملت الحكومة مش هاتحقق حاجة لو فضل الناس بالثقافة دي
بجد محتاجين شوية ايجابية لا مش شوية محتاجين 700 مليون طن ايجابية (مش عارفة اشمعنا 700 بس هو كدا)
الحاجة التانية والأهم بقى الاتفاق
بما انى واثقة ان المدونين أو قراء المدونات من أرقى العقول
وبما اني مؤمنه ان فعلا اهل التدوين واصحابه من أكثر الناس تعلقا بالايجابية ومؤمنين بفكرة تغيير انفسنا وغيرنا للأفضل
حبيت نتفق على اتفاق يكون بينا وبين ربنا

1- واحنا ماشيين في الشارع ومعانا منديل ورق أو كيس شيبسي أو حتى غلاف تشيكلتس... منرميش حاجة منهم فـ الشارع، لما نخلص كيس الشيبسي، نطبقه ونحطه فـ جيبنافي شنطتنا ولما نروح البيت نرميه فـ كيس الزبالة ولما كيس الزبالة يتملي ،،، أخ،،، تظهر المشكلة هنا ،،، مش كلنا بيعدي عليهم زبال ياخد كيس الزبالة ومش كلنا جمبهم حاوية زبالة يقدروا يرموا فيها الكيس،،، خلينا فـ اللي بيعدي عليهم الزبال أو جمبهم حاوية يقدروا يرمو فيها الكيس،،، لما الكيس يتملي إما الزبال هياخده أو انتم هترموه فـ أقرب حاوية من حاويات الزبالةالمهمواحنا ماشيين فـ الشارع، منرميش أي حاجةممكن كمان نصبر على كيس الشيبسي الفاضي اللي طبقناه فـ جيبنا لحد منلاقي مكان نرميه فيه

2- اللى عندهم عربيات في سلات شيك قوي صغيرة ياريت نشتري منها ونحطها في العربية او على الاقل يكون معانا كيس بلاستيك نرميفيه كل اللى مش محتاجينه ولما نوصل لاول سلة قمامة نرمي الكيس فيه
3- اللي يشوف حد بيرمي حاجة يفهمه بالذوق ان دة مش صح في ناس ممكن تتكسف مع ان دى مافيهاش كسوف بس ممكن بحركة تعملها تحرج اللى قدامك يعنى واحد صاحبك ماشي ورمى منديل تقوم انت تشيله وترميه في امكان المخصص ساعتها يمكن يتكسف على دمه
لو كل واحد بدا بنفسه وباهله وباصحابه شوية شوية هنلاقي نفسنا كلنا اتغيرنا وبقينا شعب متحضر... الموضوع بجد سهل جدا
ما هو احنا ما نحلمش اننا نكون شعب ليه مكانة في المجتمع واحنا عقولنا غير نظيفة (زبالة)

التسميات: edit post
24 Responses
  1. ياه دى الصورة نفسها
    مش معقول
    ليه كدا
    الصبر من عندك يا رب


  2. حاجه تغيظ بجد

    والله الي يغيظ اكتر حكايه اليابان دي

    ليه يعني كده

    وبعدين كل واحد بيقول اشمعنى انا

    بس انا بروميس هعمل كده ان شاء الله

    ربان يعينكوا ياقمره ع فعل الخير

    سلام


  3. Unknown Says:

    معاك حق في كتير من اللي قلتيه
    بس تقولي أيه في مواطن بيضع القمامة في مكانها و بيدفع رسوم نظافة
    ومحدش معبره من الحكومة
    أنا شايف ان الوعي وتكوينه ده دور حكومي يبأ مع المواطن من الصغر.

    ويبقى التواصل


  4. مامة مازن

    تفتكريايه السبب مع الناس ممكن تكون نظيغفة في بيتها ليه بنعامل الشارع بالشكل دة

    شكرا لمرورك يا جميلة


  5. موني

    ومابالك بقى اننا دولة اصلا اسلامية

    يعنى دينا وعقيدتنا بتطلب مننا النظافة

    تناقض عجيب

    موني اناليه كل ما ادخل مدونتك اوقات يقولي انه غير مسموح غير للاعضاء ؟


  6. استاذ معتز

    الانسان لما يعمل الصح دةلانهنابع من ثقافته ومن مبادئه المؤمن بيها .. ووقتها مش هاينتظر مقابل ولا نقدر نعمم القاعدة

    لانه في النهاية كل واحد سيحاسب على اعماله فقط
    سعيدة جدا بتواصل حضرتك منور


  7. Unknown Says:

    عندك حق فعلا

    ولكن ماذا نقول هي دي مصر وهذا هو شعبها وربنا يهديهم


  8. Abo 7anf Says:

    السلام عليكم
    بقى اهمال بالفطره
    اهم حاجه ان مكتوب عباره النظافه من الايمان
    و جنبها اسوأ مثال للنظافه


  9. كنت قفلاها

    كان عندي اكتئاب والحمدلله

    بس فتحتها ونورتييييييييييي بجد

    بحبك


  10. السلام عليكم
    أحيكى على هذا الموضوع الجميل
    بس للأسف فين اللى يستوعب كل ده
    بارك الله فيكى أختى الفاضله
    تحياتى
    وتقبلى مرورى
    تحياتى إيناس


  11. الفراغ Says:

    والله بنعمل كدا
    ونفسى ااقول للناس فى الشارع ماهو الصندوق جنبنا اهو
    بس فعلا بلدنا لاتشجع النظافه
    يعنى انسان محتاج حمام فى الشارع
    تلاقى الحمامات العموميه مقفوله ..يعمل ايه بقا؟!
    السوبر مركات الكبيره ..تلاقى الصناديقالفارغ وورق لف اللحمهوحاجات كتير زى دى مرميه وعليها الدبان ..تيجى بقاللراجل اللى ماشى فى الشارع ةبياكل سندوتش فول ملفوف بورق جرنال..ده هانقوله ارمى فى الصندوق ..طب ازاى!!!
    بس مصر مليانه ناس كويسه ومحترمه
    عقبال مصر كلها


  12. استاذ أحمد:
    منور يا افندم ما هوة دة الشعب بس لازم يتغير ما ينقعش الوضع يفضل كدا

    شكرا لمرورك


  13. ::::::::::::::::::::
    أبو حنف
    اول كلمة برده قلتها لما شوفت المنظر .. سلوك غريب من بلاد مسلمة

    منور المدونة ويارب تتكرر الزيارة


  14. موني

    ربنا يبعد عنك وعننا اي هم ياااارب

    بحبك انا كمان يا قمراية ما اتحرمش منك


  15. عاشقة الأحزان
    وعليكم السلام ورحمة الله
    منوراني والله اناس

    بالنسبة بين يفهم الكلام دة ..دة واجب الناس اللى عارفة الصح مش لازم بس بالكلام حتى بمجرد السلوك الصح

    ويارب على تواصل ان شاء الله


  16. فراغ

    ايه دة بجد انتي منوراني جداااااا وكلي شرف بجد بوجودك

    ومصر فيها خيير كتير الحمد الله بس عايزينه هواللي يبان اكتر ويزيد

    يارب تنوريني على طول


  17. والله عندك حق دى النظافة مسؤولية الفرد قبل المجتمع بس تقولى لمين وللاسف السلوك ده فى كل فئات المجتمع على السواء


  18. يااااه صدمتني الورة جدا
    يبقي ايه احساس اللي تعبوا و نظفوا
    معلش التغيير لا يأتي مرة و احدة لن يفقد الايجابين الامل
    و لا ايه ؟
    طبعا انا معك في كل ملاحظاتك لو كل واحد بدأ بنفسه اكيد حنشوف تغيير كبير
    بس الكلمة الاخيرة جامدة شوية
    اعتقد انها من اثر الاحباط بعد المجهود اللي بذلتوه


  19. ايوشة
    منوراني جدا .. اكيد دة سلوك موجود ولو مش موجود مش كنا اتكلمنا عنه ولانه غلط فلازم نغير

    نورتي


  20. أم احمد

    صديقتي الغالية منورة بجد

    مش عايزة اقولك شعور الناس اللي تعبت فعلا بس هما كانوا متفائلين وفرحانين باول خطوة

    انا اسفة جدا لو الكلمة الاخيرة صعبة بس انا اقصد العقول اللي مش واعية للسلوك الحضاري والاخلاقي والديني

    منورة


  21. Ehab Says:

    تصدقي اللي يعقد انك بتحكي في موضوع الناس بتحكي فيه من سنين
    ومع ذلك تحسي مفيش تقدم
    لكن ساعات بشوف ان فيه تقدم لما بلاقي حد بينفذ فعلا
    ساعات بحاول اعمل كده لكن عايز اقولك ساعات من خنقتي من البلد وتعنتهم برمي وخلاص
    بس اتناقشت مع فاخر صاحبي مره في الموضوع ده قالي وانت يا فالح بترمي علشان انت محترم ولا علشان خاطر عيونهم
    هم كده كده مبيضروش باللي هترميه انا وانت واصحابنا اللي هننضر
    اهالينا هم اللي هينضروا
    يعني انت المفروش بتتصرف بطبعك واخلاقك انت مش بطبعهم هم

    عجبني رايه واحترمته
    وبحاول امشي عليه فعلا
    بس الطبع بيغلب التطبع ساعات لكن اديني برده بحاول لحد ما يوم هبقى فل قوي

    سلاااااااااااااااااااااام


  22. dalia Says:

    تحياتي الراقية
    حقيقي أنا مبسوطه ان في ناس لسه بتفكر بالشكل ده عايزه احكيلك أني أنا واختي بنعمل ده لو شوفنا حد بيرمي أى زبالة نقوم نفهمه براحه انه كده مش بيحب بلده وعايزه اقلك انه بيفهم غلطه على طول وبيبان عليه الحرج والكسوف وبيتراجع عن موقفه
    أنا بؤمن ان الايجابية هي اقصر طريق لتحقيق ما نريد ويجب ان نبدأ بالنظامة أمام الشقة والبيت والمنطقه والمواصلات
    بس عجبني قوي " ندما نجد سيارة فارهة وسائقها شاب كاجوال وسيم ..فجأة يفتح نافذة السيارة ليلقي بورقة البيتزا في الشارع فهو بكل تأكيد ليس شاب وسيم ..عذرا فهو شاب قذر" وينطبق نفس الامر على الفتاة
    تحياتي أول زيارة وأكيد مش حتكون الاخيرة
    كان معك من القاهرة
    داليا العقاد


  23. الشنكوتي الكبير

    انت قلت حاجة مهمة جدا .. انك بتتعامل باخلاقك انت ومالكش دعوة الباقي بيتصرف ازاي

    وقلت حاجة انا مش بحبها .. ان ما فيش حاجة بتتغير.. امال ايه لزمتنا .. لما كل واحد يقول م هي بايظة بايظة

    حتى لو كدا كل يواحد يوم القيامة هايقف لواحده يتحاسب مش هيتحاسب مع ناس تانية

    سعدت جدا بمرورك نورت


  24. داليا

    براحة انا اللي سعيدة يوجود ناس بتفكر زيك انتى واختك

    ومافيش كلام بعد كلامك بجد ,, تكلمتى فاجدتي

    وانا اللي يحصلي الشرف بوجودك دايما
    منورة يا قمر