القمر الساهر


على مكتبي وتحت الضوء الخافت في مكتبتي سابحة بين أوراق كتابي ..شردت بفكري بعيدا في موقف حل بي بالأمس القريب ..عندما سألتني احدى جاراتي وصوتها يرتجف كأنها تخجل من سؤالها ( انتى عندك كام سنه ؟) فأجبتها (26 سنه) لأسمع بعدها شهقة عالية من جارة اخرى وتقول (ياااااااااه 26 دة انتي كبرتي!!) -- كنت عايزة ا لحقها بكوباية ماية احسن تروح فيها وعجي--- وتتبعها بعدها بدعوة (ربنا يكرمك بابن الحلال وتشوفي الغلب اللى موريهولى ابني محمد ) وتتنهد تنهيدة حارة كادت تحرق المكان (دة مورينى الويل ترجيع وسخونية واسهال وكل يوم بجري بيه على الدكاترة) -- انا ذنبي ايه في القرف دة-- كأنها تخشى ان ارشق ابنها عين -- صراحة انا كنت عازة ارشقها هي على قلة ذوقها--
ضيقت الناس حولي الخناق .. أرى في أعين البعض الشفقة .. وأرى في أعين آخرين الشماتة وكل هذه الأعين تقتلني .. ماذا أفعل .. وما ذنبي أنا .. هل انا المسئولة .. رحماك ربي ..
أختي الصغيرة تقطع حبل تفكيري وتقرع على باب غرفتي ..ولأجد في عينها فرحة وفي صوتها لهفة .. (عريس عريس) نظرت اليها بصمت وصرخ صدى صوتي داخلي ( هي اختى قالت عريس ولا عفريت ؟؟؟ )

لا أحد يشعر بالتوتر الذي تشعر به الفتاة في مثل هذه الموقف .. ليس توترا بسبب عدم ثقتها في نفسها .. ولكن توتر من هذه الخطوة التى على أساسها ستبني عليها حياتها كلها وتتلاطم أسئلة كثيرة
هل هو الرجل المناسب هل هو جاد هل سيكون صاحب دين وخلق هل سيكون كريم في مشاعره معي هل سيراعي الله في علاقتنا وووووووووو
حتى أصرخ وأقول (لاااااااااااا مش عايزة اتجوز) حتى اصطدم في حائط العنوسة ..لأقول
(خلاص هاتجوز انا موافقة مش مهم أقتنع المهم أحمل لقب متزوجة مش عااانس)

في الحقيقة
سادت فكرة خاطئة بين الفتيات المقبلات على الزواج وهي (أول عريس يدق الباب ويكون جاد تراه الفتاه هو زوج المستقبل) هروبا من شبح العنوسة الذي يطاردها حتى في أحلامها وتحارب الفتاة كثيرا في انجاح هذه العلاقة حتى لو وضح امامها عيوب الطرف الاخر .. متبعة مقولة
(القسمة والنصيب) (ظل راجل ولا ظل حيطة) (بكرة هايتغير ) (مراية الحب عامية)



أذا كنتي من هؤلاء الرافعات لمثل هذه الأقاويل اسمحي لي أن أقول لكِ أنك مخطئة
أذا كان الجواز قسمة ونصيب فلمااذا شرعت الخطوبة؟؟ ظل راجل ولا ظل حيطة .. اسمحي اقول ان ظل الحيطة احيانا بيكون أفيد واحسن من ظل راجل مايل بكرة هايتغير .. مافيش حد بيتغير وهذا امل واهن وحلم ضائع لن تجديه مراية الحب عامية .. بكرة هاتفتح وهستجدي كوارث ولن تجدي طريق سوا التأقلم والتعايش مع هذه الكوارث
الخطوبة لكي يتعرف كلا الطرفين على بعضهما ... والعيوب فيها تكون ظاهرة كالشمس في كبد السماء ولكن نحن من ندعي اننا لا نراها على أمل بعد الزواج ستكونِ قادرة على تغيرها أو لأنكِ تحبين هذا الشخص جدا وتتعامي عن رؤية عيوبه أو تخافي من العنوسة..


كلنا نحلم بالزوج الحنون الخلوق لكن الزواج وبناء أسرة كالبناء الشاهق يحتاج إلى أساس متين
فإذا اختارت اساس قوي ستبني عليه اسرتك الجميلة القوية في أمان ان شاء الله ,, وإذا اخترتي أساس واهن ضعيف ..فسينهار عليكِ وعلى أسرتك وتدفنون تحت الأنقاد .. الله يرحمكم
فأرمي هذه الأقاويل خلف ظهرك .. وأعلني أنك لست مريضة بفوبيا العنوسة
ولن تتزوجي أول من يدق بابك إلا من كان يستحقك ويستحق أن يكون أب لأولادك
التسميات: edit post
23 Responses
  1. تصدقي عندك حق

    كل الناس عارفين ده ياقمر

    بس المشكله ف مجتمعنا الكلام ده مش بيتطبق

    امهاتنا وابهاتنا الي غالبا من جيل اهم حاجه فيه الست تتستر ف بيت جوزها مايتفهموش زينا ان البنت تعدي ال25 من غير جواز

    والعامل المؤثر كلام الناس .. بيقولوا يعني انهم هياكلوا وشهم

    وحجات كده يعني

    فـ الثاقفه دي مش هتتغير بسهوله

    ربنا يعين بقى

    الست دي قرفتني ربنا ياخدها .. وبعدين حد يدعي دعوه زي دي اولها مقبول واخرها كعبول

    ههههههه

    تسلم اديكي (=


  2. منوراني على طول يا ايمي بجد وفرحانه دايما بوجودك حبيبتي

    وحلوة قوي كعبول دي ههههههههه جديدة

    هي المشكلة صح فى مجتمعنا وانا لما كتبت الكلام دة كان قصدي قناعة البنت جوة نفسها لازم تبقى هي قوية ومش ياثر فيها حد وتثق في نفسها
    ومش معنى انا مش اتجوزت لس ان دة عيب فيها ولازم تكون مؤمنه باللى كاتبه ربنا

    مرة تانية سعيدة بيك قو يا قمر مااتحرمش من نورك


  3. ع فكره انا موني

    هيهيهيهي

    :D


  4. هههههههههههه ماشي يا موني اصل انا بقول ايمي اكتر بس نمشيها موني زي ما انتي تحبي


  5. soly88 Says:

    اولا :المدونه شيك وستايل جديد
    ثانيا:الزواج فعلا هو قسمه ونصيب
    بس ده مش معناه ان أول واحد يخبط على الباب يبقى اوكيه
    وسن الزواج للولد والبنت حاليا ارتفع
    مع ان انا مش مع سن معين للزواج
    لكن حكاية اى زوج او زوجه والسلام دى سبب كثرة حالات الطلاق
    وفى رأى ان اهم شيىء فى الزواج هو
    التفاهم - التكافىء - وجود حد ادنى من الكيميا بين الطرفين


  6. اول مره ادخل المدونه الحقيقه مدونه لطيفه والمواضيع مكتوبه كويس جدا
    والشكل لطيف جدا
    ان شاء الله بالنجاح
    اما موضوع البوست مشش هقول لك غير كلمه واحده ارمي ورا ضهرك اي كلمه ماتعجبكيش تخص مستقبلك الجواز مش لعبه
    بس تعرفي مره بنت مطلقه قالت لي انا كنت عارفه انها جوازه فاشله وعشان كده اخدت كل احتياطاتي وقلت اهو اطلع بعيل واطلق احسن مااعيش عمري وحيده
    اهي دي ضحية من ضحايا الفكر المتخلف للمجتمع المصري


  7. soly
    مرسي يا قمر على ذوقك ..الحمد الله انها عجبتك

    وفعلا انا معاكي جدا لازم يكون فى تكافؤ مش نوافق على ي حد هرب من العنوسة ..مع اني مش بعترف بالكلمة دي اساسا

    نورتيني والله ويارب تكرريها


  8. شمس النهار

    اولا اسمك قريبمني قمر وشمس انا بحب اي اسم من الطبيعة

    ثانيا مرسي على اطرائك الجميل دة من ذوقك

    ثالثا بقى اللى انتى حكيتي عنها دي موقفها عجييييييييب قوي

    وليه مش تستنى اللى هايجي يكرمها وتجيب منه كمان الطفل

    وهي متوقعة ان وهي عاها طفل ولواحدها هاتعيش كويس؟

    تفكير عجيب فعلا

    نوريني يا جميلة


  9. S H A H Says:

    بوست رائع بجد

    تقبلي مروري الاول


  10. Wael Says:

    مش عايز اجحف الراى اللى بيقول : ان بعض الحب ياتى بعدالزواج ان لم يكن معظمه , لكن بالطبع التكافؤ مبدأ اساسى لا يجب ابدا التضحية بيه من اجل الخوف من العنوسة اوالرغبة فى الانجاب .

    كنت اتمنى ايضا لو عرضتى وجهة نظرك فى اسباب بقاء فكرة العنوسة فى المجتمع , بالرغم من التطور -ربما الظاهرى- فى افكاره وافكار الاعلام بشكل عام .

    عجبنى البوست جدا
    بس القالب معجبنيش بصراحة
    نصيحة تغيريه , لان مساحة الرؤية ضيقة جدا , والخطوط اللى ورا الكتابة بتغطى على الكتابة نفسها .

    keep posting :)


  11. اختى الجميله
    بوست هايل بصراحه
    ناقشتى فيه نقطه مهمه جداا وهو احساس الفتاة المقبله على الزواج فى سن تأخر قليلا من وجهة نظر البعض .
    أحيانا بتمتلها الرهبه من الناس . رهبه بتخليها تنسى نفسها وتنسى هى عايزة ايه .
    وكأن كل واحد فينا خلص اللى وراه وباقى بس يشوف دى عملت ايه .. ودى ايه مشكلتها .
    حياه متناقضه يا اختى بجد .
    لكن انا من رأيى .. ان الزواج هو هو فى اى سن . ليه شروط واسس وقواعد .
    مش معنى ان البنت كبرت شويه .. يبقى تتنازل عن حاجات كثير .
    غلط طبعا .
    قمرنا الجميله ..
    ادعو الله ان يوفقكِ لما فيه الخير لكِ .. قولى امين بصوت عالى ..ههههه

    حبيبتى من فضلك بس طلب بسيط .
    ياريت تكبرى حجم الخط .. لأن القراءة صعبه جداا بسبب صغر حجم الخط .

    اجمل تحيه لأختى الجديده والغاليه ان شاء الله :)


  12. S H A H

    نورت المدونة ..

    وشكرا على تعليقك وان شاء اللهمش تكون اخر مرة


  13. دكتور وائل

    بالعكس انامتفقة معاك ..معظمك الحب بيجى فعلا بعد الجواز.

    انا كان هدفي من البوست انى اكلم البنات اللى بتدمر نفسها نفسيا علشان الموضوع دة ..
    وفي توبيك تانى ان شاء الله هناقش جوانبتانية ربنا يسهل
    وسعيدة بمرورك

    وبالنسبة للقالب اناكنت اخترته لانه حسسنى انه زى دفتر بكتب في خواطري ..

    وتغيير للشكل التقليدي لبلوج.. ولما حاولت اغيره حجات كتير اتلخبطت فقلت اسيبه كدا حاليا لحد ما اتعلم اكتر

    مرة تانية مرسي قوي على مرورك اسعدني ويارب تكررها


  14. ضي القمر.. شكل في علاقة خفية بينك وبين القمر زى حالاتى ..

    واااااامين بصوت عالي ليا ولكا بنات وشباب المسلمين ياااارب

    سعيدة قوي ان البوست جبكوانا متفقة معاكان في اسس مستحيل نتنازل عنها علشان نظرة الناس لااننا احنا اللى هانعيش الحياة دى مش الناس

    ..بالنسبة للخط هو ظاهر عندى كبير لانى مكبرة الخط من صفحة الاكسبلورراصلا
    عموما غالي والطلب رخيص

    مرسي على مرورك يا قمر


  15. سقراط Says:

    بجد مش عارف اعلق واقولك ايه
    انت ما سبتيش اى مجال للكلام
    انا موافقك تماما فى كل اللى قلتيه
    وبحييكي على موقفك
    وعلى فكرة انا قريت التدوينات اللى قبل كده
    وعايز اقولك
    أحسنتِ


  16. mimi Says:

    وأنا أقول المدونة دي منورة ليه؟
    اتاري داخلها شمس واحدة وقمرين...
    شكرا علي تعليقك وزيارتك ويارب دايما...
    أما بقي الكلام عن العنوسة وشبحها ... عاوز مدونات كتير ... بس ده ابتلاء من ربنا علي الأمة كلها وعلينا اننا نصبر وبالدعاء تفك الكروب ... وانصح أي بنت انها تتجوز عن اقتناع كامل 100% علشان ده عمر كامل يا عالم حلو ولا وحش ..
    وربنا معانا دا إحنا ولايا
    ولا إيه؟؟؟؟؟؟؟؟؟؟


  17. صدقتِ
    =====
    ممكن تشيلى تأكيد الكلمة حين ارسال التعليق


  18. norahaty Says:

    السلام عليكم ورحمة
    الله تعالى وبركاته
    معلش لىّ رأى يمكن مخالف
    لانك لسه فى منتصف العشرينات
    وممكن رأيك ده يتغير بعد الثلاثينات
    الزواج شرع الله لنا وسبيل لحياة عادية فى عالم غير عادى وللاسف.


  19. اختى قمر موضوعك عجبنى جدا وحطيتى ايدك فعلا على اهم واغبى امثال شعبية الناس ما زالت تؤمن بيهم حتى فى ظل ظروف التقدم الرهيبة التى يشهدها العالم الان

    فى مثل مهم جدا الناس مش عايزة تعترف بيه وهو قعدة الخزانة ولا جوازة الندامة رغم اعتراضى على مفردات كثير من الامثال الا ان ده وضح معنى ان البنت ممكن تعيش طول العمر من غير جواز احسن من انها تتجوز جوازة فاشلة
    اتمنى لكى وكل البنات السعادة وان يرزقكن من ترضون دينه وخلقه
    امين يا رب العالمين


  20. سقراط دايما منور بجد

    وبستنى دايما رايك

    ربنا يكرمك


  21. ميمي

    المدونة منورة بيك وبكل الزوار الحلولين جدا جدا

    وانا معاك لازم يكون في اقتناع لان الجواز اعمق بكتير من ما الناس فهماه ومستقبل وحياة

    ياريت اشوفك منورة على طول


  22. موناليزا .. علم وينفذ يا قمر ولا يهمك

    معلش انا لسه جديدةومش اعرف قوي في كل اعدادات البلوج

    منورانى


  23. norahaty ..

    وعليكم السلام ورحمة الله وبركاته

    انا معاك يمكن لانى لسه في العشرينات

    بس انا كنت اقصد ان ليه نهمش بسدورالبنت في الزواج وانها لازم تتنازل على حجات كتير علشان تحمل لقب متزوجة؟؟

    احسن ما تحمل لقب مطلقة مثلا بسبب سوء الاختيار والتنازل ؟؟

    ربنا يكرم بنات المسلمين كلهم يارب

    منورانى والله